Anither ticht-packit braidcast fu o wee Scots gems.

The braw wark done by Dig It 2015 on bringin thegither the warlds o Education, Archaeology an the Scots leid wis a highlight. Fundit bi Historic Scotland – nou kent as Historic Environment Scotland – the project introduced bairns tae the historical connections in their Scots wirds.

Oor launscape is stappit fu o Scots places names, that tells us aboot the airt. A guid exaimple is Tod Head lighthouse – Tod bein the Scots wird fir Fox. Fae the nemme wi ken a bit aboot the fauna there. An wi Ghaist Loan, near a Moray kirkyaird, an Bogle Den in the Cabrach we get a clue as tae the beliefs o the fowk that gied the place a nemme, as weel’s the leid they spoke in.

The fantoosh wabsite set up as a kist tae haud aa the results o Dig ti 2015 is still available here: http://www.digitscotland.com/

O course Scots Radio is the programme that just doesnae hing aboot, sae efter Dig It we were straight aff tae meet wi Andy Cannon tae hear aboot his Tales o a Grandson. This is Andy’s storytelling lesson in Scottish history inspired by Sir Walter Scott’s Tales o a Grandfather an the strang relationship atween Cannon an his granfaither.

Andy’s granfaither took him oot on a tour o Scotland, tae see Nessie at Loch Ness, an on the wey tae Drumnadrochit telt young Andy aa aboot the history o Scotland, aboot the great heros, battles and wee fowk that mak up oor past. As Andy himsel reached 50, he decidit he wantit tae dae a series o stories communicatin that past tae the neist generations. He spake tae Frieda Morrison just afore he took his stories awa on tour.

Andy introduced us tae a braw sang anaa, In frienships name sung bi the remairkable Gordeanna McCulloch, afore he lea’d us wi a quote fae the sang:

Happy we’ve been aathegither
Cantie we’ve been yin an aa
Time shall see us aa mair blyther
Ere we rise tae gang away

Stories are aye pairt o whit we dae at Scots Radio, sae it wis ainly fittin that we fund time fir ane mair afore the end. This time it wis the tale o the Maiden Stone. The story is pleyed oot on the braes o Bennachie, whaur Auld Nick gets intae a pact wi a local lassie aboot whether or nae she’ll mairry him.

There wis a warld-first retellin o this famous tale, wi a group makkin a Doric Opera an performin it on location at Bennachie, alang wi a hail wheen locals bairns. Tune in tae hear an extract fae the performance an lairn mair.

Subscribe To Our Newsletter

Join our mailing list to receive the latest news and updates from Scots Radio.

You have Successfully Subscribed!